គេហដ្ឋានសំណព្វចិត្តខ្ញុំ ត្រូវបានម្ចាស់វា​​រុះចោល​បាត់​ហើយ…

ក្នុង​ដំណើរ​ទៅ​ខេត្តបាត់​ដំបង កាលពីពេល​ក្រោយ​បុណ្យ​ចូល​ឆ្នាំ​ខ្មែរ​កន្លង​ទៅនេះ ខ្ញុំទទួល​នូវ​​អារម្មណ៍ ស្រងេះស្រងោច​យ៉ាងម៉េច​ទេ…។ នោះ​គឺទិដ្ឋភាព​ដីទទេ នៃ​​គេហដ្ឋាន​ដែល​ខ្ញុំ​តាម​ប្រមាញ់​ថតរូប ​អស់​រយៈពេល ៣ឆ្នាំ​កន្លងមកនេះ ហើយ​ដែល​បច្ចុប្បន្ន​មិន​ដឹងថា តើ​ម្ចាស់​វា​រុះចោលបាត់​តាំងពី​អង្កាលណា​ទេ?

អស់​លោក​អ្នក​ប្រហែល​ជា​នៅ​ចាំ​បានថា កាលពី​អំឡុង​ចុង​ខែ​កញ្ញា ឆ្នាំ២០១៤, ខ្ញុំបាន​ដាក់​ប្រកាស​មួយ​ មាន​ចំណង​ជើង​ថា៖ ជារូបភាព, ធ្វើស្រែ​មួយឆ្នាំ កើនទ្រព្យ​សម្បត្តិ​បាន «ពាងទឹក» តែបីគត់… ដែល​កាលណោះ ខ្ញុំ​បាន​ថតបង្ហាញ​នូវ​គេហដ្ឋាន​របស់​កសិករ​មួយគ្រួសារ ស្ថិត​នៅ​តាម​ដង​ផ្លូច​ជាតិ​លេខ៥ ចន្លោះ​បង្គោល​គីឡូម៉ែត្រ​លេខ ១៤៨-១៤៩ ជិត​ដល់​ទីប្រជុំជន​ក្រគរ…។

បន្ទាប់មក នៅពាក់កណ្តាល​ខែឧសភា ឆ្នាំ២០១៥ កន្លងទៅ ខ្ញុំក៏​បាន​ដាក់​ប្រកាស​មួយ​ទៀត ទាក់ទង​នឹង​គេហដ្ឋាន​នេះ​ផងដែរ ដែល​មាន​ចំណង​ជើង​ថា៖ ឆ្នាំនេះ, គេហដ្ឋាន​សំណព្វចិត្ត​ខ្ញុំ បាន​ដូរ​ជញ្ជាំងពី​ស្លឹក ទៅសង្ក័សី​ហើយ… ដែល​កាលណោះ​ ខ្ញុំ​ថែម​ទាំង​បាន​ដាក់​ជា​សំណួរ​សួរថា តើពេល​ណា​ទើប​ម្ចាស់​គេហដ្ឋាន​នេះ មាន​លទ្ធភាព​សន្សំ​ប្រាក់ ដើម្បី​ធ្វើ​ផ្ទះ​ធំ​ទ្រនំ​ខ្ពស់ រស់​នៅ​អោយ​បាន​សម​រម្យ​ដូច​គេ​ដូច​ឯង​ទៅ?…

ឥឡូវ​ ខ្ញុំបាន​ត្រឹម​តែឃើញ​ទីផ្ទះទទេ…។ ដោយគ្មាន​អ្នកជិតខាង​ដើម្បី​សួរនាំ ខ្ញុំ​បាន​ត្រឹម​តែ​គិត​ស្មានថា តាម​រយៈ​នៃ​ការ​ដោះដូរ​ដីធ្លី, ក្រុម​គ្រួសារនេះច្បាស់​ជា​រើ​ផ្ទះ ទៅ​នៅ​ឆ្ងាយ​ពី​ថ្នល់​ជាតិហើយ…។ ប្រសិន​បើ​ថ្ងៃ​ក្រោយ​ខ្ញុំដឹង, ខ្ញុំ​នឹង​ទៅ​តាម​ថត​គេហដ្ឋាន​របស់​ក្រុម​គ្រួសារ​នេះ​ទៀត។

សូមជូនពរ​អោយ​​កសិករ​មួយ​គ្រួសារនេះ ចម្រើន​ដោយទ្រព្យ និង​មាន​សុភមង្គល..!!..

រូបថតខែកញ្ញា ឆ្នាំ២០១៣

រូបថតខែកញ្ញា ឆ្នាំ២០១៣ នៅ​អត់​មានពាងទឹកធំៗបី នៅឡើយ…

រូបថតខែវិច្ឆិកា ឆ្នាំ២០១៤

រូបថតខែវិច្ឆិកា ឆ្នាំ២០១៤… ជារូបភាព, ធ្វើស្រែ១ឆ្នាំ ឃើញ​កើន​ពាងដាក់​ទឹក​បាន​ ៣…

រូបថតខែមេសា ឆ្នាំ២០១៥

រូបថតខែមេសា ឆ្នាំ២០១៥ គេហដ្ឋាន​នៅ​ជញ្ជាំង​ស្លឹក​នៅ​ឡើយ…

រូបថតខែឧសភា ឆ្នាំ២០១៥

រូបថតខែឧសភា ឆ្នាំ២០១៥ ជញ្ជាំង​ត្រូវ​បាន​ដូរ​ពី​ស្លឹក មក​ជា​សង័្គសីហើយ…

រូបថតខែមេសា ឆ្នាំ២០១៦

រូបថតខែមេសា ឆ្នាំ២០១៦ ឃើញតែដីទីផ្ទះ​ទទេ…

ស្រុកស្រែ

ត់ើ ​ពេល​ណា​ទើប​​ពួក​​គេ​​មាន​លទ្ធភាព​​សន្សំ​ប្រាក់​ ដើម្បី​ធ្វើ​​ផ្ទះ​ធំ​ទ្រនំ​ខ្ពស់​ រស់​នៅ​អោយ​បាន​សមរម្យ​ដូច​គេ​ដូច​ឯង​ទៅ?… – See more at: http://www.sroksrear.com/house_countryside/#sthash.cxYTSQuj.dpuf
ជារូបភាព, ធ្វើស្រែ​មួយឆ្នាំ កើនទ្រព្យសម្បត្តិ​បាន ​«ពាងទឹក» តែបី​គត់ – See more at: http://www.sroksrear.com/li

Gallery

រឿងព្រេងខ្មែរ៖ ចៅមាណព និងត្រីកន្រ្តប់

This gallery contains 1 photos.

កាលពីព្រេងនាយ មានចៅមាណពម្នាក់ ប្រកប​របរ​ជាអ្នកកាប់អុស។ សម័យកាល​ថ្ងៃមួយ នៅពេល​ដែល​អុសក្នុងព្រៃ​កាន់តែខ្សត់ទៅៗ ចៅមាណពក៏បែកគំនិត គិតចង់ប្រកប​របរ​ជាអ្នក​នេសាទត្រី​វិញម្តង។ គិតដូច្នេះហើយ ចៅមាណព​ក៏ទៅកាប់​មែកឬស្សី​ ដើម្បីយកមកពត់​ធ្វើជាដងសន្ទូច ហើយ​ខំប្រឹង​ពត់​ដែក​ ដែល​រើស​បាន​ពី​គំនរអេតចាយ រហូត​បង្កើត​បាន​ជា​ផ្លែ​សន្ទូច​យ៉ាង​​ខ្ញង់​មួយ…។ ពេលរៀបចំ​​បាន​សន្ទូច​ស្ទូច​ត្រី​ត្រឹម​ត្រូវ​​ហើយ ចៅមាណព​គិត​ថា នឹង​យកសន្ទូច​នេះ ​ទៅស្ទូចត្រី​នៅ​បឹង​រំដួល ដែល​ស្ថិត​នៅ​មិន​ឆ្ងាយ​ប៉ុន្មាន​ ពី​ខាង​ក្រោយ​ផ្ទះ…។ លុះព្រលឹម​ស្រាងៗឡើង ចៅមាណព​ឈប់​កាន់​កាំបិតផ្គាក់​ ដើរ​ចូល​ព្រៃ​​កាប់​អុស​ដូច​ពី​មុន​ទៀតហើយ។ ចាប់​ពី​ពេល​នេះ​តទៅ ចៅមាណព​នឹង​បែរ​​មក​កាន់​សន្ទូច​ ដើម្បី​​​ស្ទូច​ត្រី​ចិញ្ចឹម​ជីវិត​វិញ​ម្តង។ ដោយសារមិន​ធ្លាប់ដែល​​ស្ទូចត្រី ទើប​ចៅមាណព​មិន​ដឹងថា តើ​ត្រូវ​ប្រើ​នុយអី​ដើម្បី​ស្ទូច​ត្រី​បាន​យក​មក​ទទួល​ទាន?… គិតចុះ​គិតឡើង ចៅមាណព​ក្រឡេក​ឃើញ​ផ្កា​ននោង​​កំពុង​រីក ដែល​ដាំ​នៅ​លើ​ទ្រើង​មុខផ្ទះ ក៏គិតថា បើ​ប្រើ​នុយ​ផ្កា​ននោង​ អាច​បញ្ចោត​ត្រីមក​ស៊ីផ្លែ​សន្ទូច​បាន ព្រោះ​​ផ្កា​វា​មានពណ៌លឿង​ប្លែកល្អ​ណាស់។ គិតរួច ចៅមាណព​ក៏ដើរ​ទៅបេះ​ផ្កា​ននោងបាន​​ពីរបី​ ដាក់​ចូល​ក្នុង​ថ្នក់​ក្រមារ ហើយ​ដើរ​សំដៅ​ទៅបឹង​ក្រោយ​​ផ្ទះ…។ ពេល​ធ្វើ​ដំណើរ​​ដល់​បឹងរំដួលភ្លាម … Continue reading

Gallery

ស្វាគមន៍ ការវិលត្រឡប់ម្តងទៀត..!!​..

This gallery contains 1 photos.

ដោយសារចង់អោយប្លុក«ឆុកឈែ»ខ្ញុំ មានដំណើរការឡើងវិញ នេះម៉្យាង, ម៉្យាងទៀត ដោយសារ​បច្ចុប្បន្ន មានព្រឹត្តិការណ៍នានា បានកើតមានច្រើនឡើងៗ ស្ទើរតែកត់ត្រា​សឹង​មិន​ទាន់ ទើបខ្ញុំសម្រេចចិត្ត វិលមកប្លុករបស់ខ្ញុំវិញ ក្នុងបំណងធ្វើការកត់ត្រា ទៅតាម​អ្វី​ដែល​ខ្ញុំ​អាច​មើល​ឃើញ និង​កត់ត្រាបាន ដើម្បីជាប្រយោជន៍ ទុក​សម្រាប់​មនុស្សជំនាន់ក្រោយ ងាយស្រួល​ក្នុងការ​សិក្សា​ស្រាវជ្រាវ…។ ក្នុង​ន័យនេះ, ខ្ញុំមិនមានបំណងសូម្បីតែបន្តិច ក្នុងការចង់ក្លាយខ្លួនជា​អ្នក​តាមដាន​​កត់​ត្រា​​ប្រវត្តិសាស្រ្តអីទេ ហើយ​រិតតែចង់ជៀស​អោយ​ឆ្ងាយ​ថែម​ទៀត ពីការចង់​ក្លាយ​ខ្លួន​ទៅ​ជា​ «អ្នកវិភាគ» ដោយ​​ប្រើ​ចុងស្លាបប៉ាកា​នៅ​ទីនេះ​ផង​ដែរ ព្រោះថា កិច្ចការ​ទាំង​ពីរ​នេះ​ប្រៀប​​ដូច​​ជា​​វិញ្ញាសារ​ដើរ​លើ​ខ្សែពួរ​មួយ​អញ្ចឹងៈ បើ​ផ្អៀងទៅស្តាំ នឹងបង្កើតភាព​ជា​អមិត្ត​នៅលើ​បណ្តាញ​សង្គម​ហ្វេសប៊ុក, បើ​ផ្អៀងទៅឆ្វេង ប្រៀបដូច​ជា​ការ​តំឡើង​អង្គប់​សម្រាប់​ដាក់ខ្លួនឯងដែរ..!!… ដោយ​បែបនេះ, តាម​ទស្សនៈដើម «មើលឃើញថា» ​របស់​ប្លុកស្រុកស្រែខ្ញុំ, ខ្ញុំ​ត្រូវ​តែ​ព្យាយាម​​ដើរ​ផ្លូវ​កណ្តាល… គឺថា សំរាប់​គូភាគី​ទាំង​សងខាង បើខ្ញុំលើកជើង ត្រូវ​លើក​មិន​​អោយ«​លេចយីហោ»… ហើយ​បើ​ចង់ «វ៉ៃ»វិញ … Continue reading

Gallery

ស្រុកយើង សម្បូរអ្នកជំនាញ..!!..

This gallery contains 12 photos.

ដូចខាននិយាយយូរ..!!.. គិតៗទៅ រឿងបាត់មុខពីទីនេះ គឺដោយសារមានមូលហេតុធំៗ​ពីរ៖ ទីមួយ គឺជំងឺខ្ជិលរបស់ខ្ញុំ បានរើឡើងវិញ…  និងទីពីរ ខ្ញុំសង្កេត​ឃើញ​នយោបាយ​ស្រុកទេស ឡើងកម្តៅ​ខ្លាំងពេក ចាប់តាំងពីរឿងផ្ទៀងផ្ទាត់ផែនទី, រឿងព្រំដែន, រឿងមានអ្នកជាប់គុក, រហូតមកដល់ថ្មីៗនេះ មានរឿង  “ផាដាក់គ្នា​” ក្នុងសភាជាតិទៀត ទើបខ្ញុំ​ត្រូវ​តែ​បង្ខំចិត្ត សំងំ​ស្ងៀម​… ចាំមើលឈុតឆាកគេ «សម្តែង» បន្តទៀត…។ ចំពោះរឿងដែល​ខ្ញុំចង់លើកយកមកនិយាយថ្ងៃនេះ មិនមែនរឿងផែនទី រឿងព្រំដែន ព្រំដោញអីទេ… តែជារឿងតឹងទ្រូងពេក… គឺជារឿងឆ្ងល់លេងៗ… ជាចំងល់​តាមបែបរាស្រ្តតូចតាច ដោយ​មិនដឹង​ទៅសួរ​​ខាងណា?… រឿងឆ្ងល់នោះគឺ៖ តាមការសង្កេតរបស់ខ្ញុំ ចិញ្ចើមផ្លូវ និងផ្លូវថ្នល់មួយចំនួន​ នៅក្នុងក្រុងភ្នំពេញ​របស់​យើង ត្រូវ​បាន​ធ្វើ​អោយ​រញ៉េរញៃដោយសារការ «ជីកគាស់»។ ខ្ញុំមិនជំទាស់​ប្រឆាំង​នឹង​ការជីកគាស់​ថ្នល់ និង​ចិញ្ចើម​ថ្នល់​សាធារណៈរបស់​រដ្ឋ​យើង​ទេ ព្រោះ​អ្នក​មក​ជីកគាស់​ទាំងអស់​នោះ … Continue reading

Gallery

ផ្សាយឡើងវិញ៖ គ្រួសារខ្ញុំឈ្លោះគ្នា ​ដោយសារ​ការបោះបង្គោល​ព្រំដី…

This gallery contains 1 photos.

សំគាល់៖ ប្រកាសនេះ ខ្ញុំបានសរសេរចុះផ្សាយ​កាលពីថ្ងៃទី ២៦ ខែមិថុនា ឆ្នាំ២០១២ គឺនៅ​ក្នុង​អំឡុងពេល​ដែលខ្ញុំ​សំឡឹង​ឃើញ​​ជម្លោះ​ផ្ទៃក្នុង​នៃ​អ្នក​នយោបាយ​​​ខ្មែរ ​ស្តីពីបញ្ហា​ព្រំដែនទាំង​ខាង​លិច ទាំង​ខាង​កើត ​បាន​កើន​ឡើង​កម្តៅ​​គួរ​អោយ​ព្រួយ​បារម្ភ…។ នៅប៉ែកខាងលិច, កម្ពុជាយើង​កំពុង​មាន​ជម្លោះ​ប្រដាប់​អាវុធ​​ជា​មួយ​ប្រទេស​ថៃ នៅ​ក្នុង​សំណុំ​រឿង​ប្រាសាទ​ព្រះវិហារ។ រីឯនៅ​ប៉ែកខាងកើតវិញ លោក​មេបក្ស​ប្រឆាំង​នៅ​ស្រុកយើង បាន​បង្កជម្លោះ​​ជា​​មួយ​ប្រទេស​វៀតណាម តាម​រយៈការដកបង្គោល​តម្រុយ​ព្រំដែន ​ដែល​បាន​កំណត់​ដោយ​គណៈកម្មការ​ព្រំដែន​នៃ​ប្រទេស​ទាំង​ពីរ។ ដោយសារ​​ទង្វើនេះ, លោកមេបក្ស​ប្រឆាំង បាន​ក្លាយ​ជា​អ្នក​មាន​ទោស​ជាប់​ខ្លួន ហើយក៏​​សម្រេច​ចិត្ត​គេច​​ខ្លួន​ទៅរស់​នៅ​ក្រៅ​ប្រទេស​យូរ​គួរ​សមដែរ។ ក្នុង​ពេល​ដំណាល​គ្នានេះ កាលបរិច្ឆេទនៃ​ការ​បោះឆ្នោត​សកល​​ឆ្នាំ២០១៣ នៅសល់​រយៈ​ពេល​​ត្រឹមតែ ​១២ខែគត់…។ ជាមួយ​គ្នានេះ ព្រះបរមរតនកោដ្ឋ ព្រះអង្គទ្រង់នៅ​មាន​ព្រះ​ជន្ម​នៅឡើយ ហើយ​ទ្រង់​ឧស្សាហ៍​​យាង​ទៅ​ព្យាបាល​ព្រះរោគ​នៅ​ប្រទេស​ចិន​ ញឹកញាប់​ណាស់…។ ដោយសារ​តែថ្មីៗនេះ ​រឿង​ដដែលនេះ​បាន​កើន​កម្តៅ​​ឡើង​វិញ​​ តាម​រយៈ​សង្គ្រាម​ពាក្យ​សំដី​នៃ​អ្នក​នយោបាយខ្មែរ ទើប​ខ្ញុំ​សម្រេច​យក​ប្រកាស​ចាស់ដដែលនេះ យក​មក​ផ្សាយ​ឡើង​វិញ ដើម្បីអាន​លេង​គ្រាន់​កែ​អផ្សុកខ្លះៗ..!!.. ___________________________ គ្រួសារខ្ញុំឈ្លោះគ្នា ​ដោយសារ​ការបោះបង្គោល​ព្រំដី … Continue reading

Gallery

ផ្សាយឡើងវិញ៖ រឿងរ៉ាវ​នៅ​វិទ្យាល័យ​ព្រះយុគន្ធរ ​កាលពី ៤១ឆ្នាំ​មុន…

This gallery contains 12 photos.

សំគាល់ៈ ខាងលើ​នេះ ជាសំណៅ​ដើម​របស់​​កាសែត​ “នគរធំ” លេខ​ចេញ​ផ្សាយ​ថ្ងៃទី ១៤ កក្កដា ១៩៧៤ ​​​មាន​ចំណង​ជើង​ធំៗ​ដាក់​ថា «ព្រឹត្តិការណ៍ថ្ងៃទី ៤ មិថុនា ៧៤» ដែល​ខ្ញុំ​រក​ឃើញ​នៅ​ក្នុង​គេហទំព័រ​មួយ។ ដំណឹង​នេះ​ត្រូវ​បាន​សរសេរ​ដោយ​អ្នក​យក​ព័ត៌មាន​មួយ​រូប​​ឈ្មោះ​ ផាន់ ផេង ដែល​បាន​រៀប​រាប់​យ៉ាង​លំអិត​​អំពី​ព្រឹត្តិការណ៍​ប៉ះ​ទង្គិច​គ្នា រវាង​​​កង​កំឡាំង​សមត្ថកិច្ច និង​ក្រុម​សិស្ស​​សាលា ១៨មីនា ​ហើយ​នៅ​ក្នុង​ហេតុ​ការណ៍នោះ ក៏​មាន​​​​​ការ​បាញ់​សំឡាប់​លោក​រដ្ឋមន្រ្តី​ក្រសួង​អប់រំ​ជាតិ កែវ សង់គីម និង​ទីប្រឹក្សា​ផ្ទាល់​​របស់​លោក គឺ​លោក ថាច់ ជា នៅ​ក្នុង​បរិវេណ​វិទ្យាល័យ ១៨មីនា​ តែ​ម្តង នាវេលា​រសៀល​ថ្ងៃ​ទី ៤ មិថុនា ១៩៧៤…។ លោក កែវ សង់គីម ដែល​មាន​វ័យ … Continue reading

Gallery

ក្រឡេក​មើលការ​បែងចែក​ដែន​​រដ្ឋបាល​គ្រប់គ្រង​ ក្នុង​របប​កម្ពុជាប្រជាធិបតេយ្យ

This gallery contains 2 photos.

សម្រាប់​អស់លោក​អ្នក​ដែល​កើត​ក្រោយ​ឆ្នាំ១៩៧៩ ហើយ​ដែល​មិន​បាន​យកចិត្ត​ទុកដាក់​ស្វែង​យល់​ពី​របប​ខ្មែរ​ក្រហម កម្ពុជា​ប្រជាធិបតេយ្យទេ, ខ្ញុំជឿ​ថា អស់​លោក​អ្នក​នៅ​តែ​មិន​ដឹង​រហូត… នោះគឺ​ការ​បែង​ចែក​តំបន់​រដ្ឋបាល​គ្រប់​គ្រងនៅ​ក្នុង​​​របប​នោះ ​នៅ​ចន្លោះ​ពី​ខែ មេសា ឆ្នាំ១៩៧៥ រហូត​ដល់​ខែ​មករា ឆ្នាំ១៩៧៩​ ។ ហេតុ​ដូច្នេះ ខ្ញុំ​ចង់​នាំ​អារម្មណ៍​អស់​លោក​អ្នក អញ្ជើញ​មក​ធ្វើ​ការ​ស្វែង​យល់​ជា​មួយ​ខ្ញុំ ថា​តើក្រុម​​មេដឹកនាំ​​ខ្មែរ​ក្រហម ​​ធ្វើ​ការ​ពុះ​ចែក​ខេត្ត​-ក្រុង​ក្នុង​ប្រទេស​កម្ពុជា អោយ​ទៅ​ជា​តំបន់, ជាភូមិភាគ​​ ដោយ​របៀបម៉េច?… ដោយ​កង្វះ​ឯកសារ​ក្នុង​របប​កម្ពុជា​ប្រជាធិបតេយ្យ, នៅ​ទី​នេះ ខ្ញុំ​រក​​​ផែនទី​​របស់​ក្រុម​លោក ប៉ុល ពត បានតែ​មួយ​សន្លឹក​គត់ ​(Map-A) ​ដែល​ផលិត​ឡើង​ក្នុង​អំឡុង​ឆ្នាំ ១៩៧៧ ។ ឯផែនទី​មួយ​ផ្ទាំង​ទៀត ​ជា​ផែនទីគូរថ្មី (Map-B) ដែល​ចំឡង​ពី​ផែនទីចាស់ តែមិន​មានដាក់​​កាលបរិច្ឆេទ​​ទេ។ ផ្ទៀងផ្ទាត់​គ្នាទៅ ​ផែនទីដែល​ចំឡង​ថ្មី​នេះ គឺហាក់​ដូច​ជា​មាន​ការ​បែង​ចែក​ឡើង​វិញ​ ទៅលើ​ដែន​រដ្ឋបាល​គ្រប់​គ្រង ដែល​ខុស​ពី​ផែនទី​ផលិត​ក្នុង​​ឆ្នាំ​១៩៧៧ មួយ​សន្លឹក​ខាង​លើ…។ ផ្អែកតាម​សន្លឹកផែនទី … Continue reading

Gallery

តើនគរចាម្ប៉ា ​បាត់បង់​​​ទៅ​​ដោយ​របៀប​ម៉េច?

This gallery contains 2 photos.

*** ដោយសារ​មាន​សំណួរពី​មិត្ត​ភក្រ្ត​ជា​ច្រើន​​​បាន​សួរ​ខ្ញុំ​ថា តើ​នគរ​ចាម្ប៉ា​ ​បាត់​បង់​ទៅ​ដោយ​របៀប​​ម៉េច?… ហើយ​ខ្ញុំ​ក៏​ខំ​ស្វែង​រក​ចំឡើយ​នេះ ​នៅ​ក្នុង​​​​សៀវ​ភៅ​​​ប្រវត្តិ​សាស្រ្ត​ពីរបី​ក្បាល​ ​​ដើម្បី​ផ្ទៀង​ផ្ទាត់​គ្នា​មើល​ពី​ព្រឹត្តិការណ៍​​​​ប្រវត្តិសាស្រ្ត ដែល​បាន​កើត​ឡើង​នា​​ពេល​នោះ​។ ក្នុង​ចំណោម​សៀវភៅ​ទាំង​នោះ គឺ​មាន​តែ​សៀវភៅ​របស់​លោក​អាដេម៉ា ឡឺក្លែរ ទេ​ដែល​រៀប​រាប់​បាន​ក្បោះក្បាយ​ជាង​គេ។ ​​ខាងក្រោមនេះ គឺ​ជាអត្ថបទដកស្រង់​ដោយ​សង្ខេប​ចេញ​​ពី​សៀវភៅ ​ប្រវត្តិសាស្រ្ត​​ប្រទេស​​កម្ពុជា និពន្ធ​ដោយ​​លោក អាដេម៉ារ ឡឺក្លែរ (Adhémar Leclère)  បោះ​ពុម្ព​ផ្សាយ​​​នៅបារីស ឆ្នាំ១៩១៤ ។ ខ្ញុំ​សូម​ជំរាប​ផង​ដែរ​ថា ​ការ​ដែល​ខ្ញុំ​សំរេច​ចិត្ត​ចុះ​ផ្សាយ​អត្ថបទ​ដក​ស្រង់​នេះ​ គឺ​ខ្ញុំ​​មិន​មាន​បំណង​ឆ្កឹះកកាយ​ប្រវត្តិសាស្រ្ត​ចាស់ ដើម្បី​ធ្វើ​ជា​ឆ្នួន​បញ្ឆេះ​​កំហឹង​ជាតិ​និយម អោយ​ស្អប់​ជាតិ​សាសន៍​ដទៃ​នោះ​ទេ។ អ្វីៗ​​ដែល​បាន​កើត​ឡើង​​​​ចំពោះ​​ប្រទេស​ចាម្ប៉ាពី​អតីតកាល គឺ​​ជា​ព្រឹត្តិការណ៍​​​ប្រវត្តិសាស្រ្ត​មួយ ​ដែល​បាន​ឆ្លុះ​បញ្ចាំង​អោយ​ឃើញ​​ពី​​សិល្បៈ​នៃ​ការ​ដឹក​នាំ ​ក្នុង​សម័យ​កាល​​​​នាំ​គ្នា​ធ្វើ​សង្រ្គាម​ពង្រីក​ទឹក​ដី ​ដែល​បាន​ផ្តល់​​កិត្តិយស​ទៅ​លើ​អ្នកណា​ខ្លាំង អ្នកហ្នឹងឈ្នះ…។ ******************** នៅសម័យ​ដែល​ស្តេច​វង្ស​វរ្ម័ន​អស់​អំណាច​ពី​ប្រទេស​កម្ពុជា ហើយ​តាចាយ ឬតាជ័យ ដែល​ជា​នាយ​ក្រុម​ដំណាំ​ត្រសក់​ផ្អែម ត្រូវ​បាន​គេ​លើក​អោយ​ឡើង​សោយ​រាជ្យ​លើ​រាជបល្ល័ង្គ(សូមចូលទៅអាន … Continue reading

Gallery

អារាម​វត្ត​ស្បូវរីក, ជា​អតីត​​មន្ទីរ​ពេទ្យ​ប្រចាំ​​សហករណ៍​​លាជ…

This gallery contains 45 photos.

ក្នុងឳកាស​បាន​ទៅដល់​អតីត​សហករណ៍លាជ កាល​ពី​មុន​អំឡុង​ពេលបុណ្យ​ចូល​ឆ្នាំ​ខ្មែរ, ខ្ញុំក៏មិនភ្លេច​ចូលថត​អារាម​ព្រះពុទ្ធ​សាសនា​បាន​មួយ​​កន្លែង​ផងដែរ… នោះគឺ វត្ត​ស្បូវរីក ដ៏ចំណាស់ ដែលស្ថិត​ជិត​ទីប្រជុំជន​ស្រុក​ភ្នំក្រវាញ​តែម្តង ។ តាម​ពិតទៅ ប្រកាសមួយនេះ ខ្ញុំគួរតែ​ចុះផ្សាយតាំងពីយូរ… គឺគួរ​តែ​ចុះ​ផ្សាយ​អោយ​ចំ​​ក្នុង​អំឡុង​ខួបឆ្នាំទី៤០ នៃ​មហា​ជ័យជំនះ ១៧មេសា ដ៏មហាអស្ចារ្យ របស់​ពួក​កងទ័ព​រំដោះ ទៅ​លើ​កងទ័ព​របស់​​លោក​សេនា​ប្រមុខ លន់ នល់ ដែលមាន​ចក្រពត្តិអាមេរិក​ជាមេក្លោង​(sic!) …។  តែ​ដោយសារ​ខ្ញុំ​ចង់ស្រាវ​ជ្រាវ​រក​ប្រវត្តិនៃ​ទី​អារាម​នេះ​ កាល​ពី​ក្នុង​អំឡុង​របប​ខ្មែរ​ក្រហម​គ្រប់​គ្រង ដែល​កាល​ណោះ ពួកគេ​បាន​ប្រែក្លាយ​វត្តស្បូវរីក​​នេះ អោយ​ទៅ​ជា​មន្ទីរពេទ្យ​ប្រចាំ​សហករណ៍លាជ ឬ​ក៏អាច​ជា​មន្ទីរ​ពេទ្យ​ស្រុកភ្នំក្រវាញ នេះតែម្តង ទើបបាន​ជា​ខ្ញុំ​មិន​ដាច់​ចិត្ត​ចុះផ្សាយ​ភ្លាមៗ…។ ទាក់​ទង​នឹង​រឿង​នេះ ​ខ្ញុំ​មាន​ការលំបាកក្នុង​ការ​ស្វែង​​រកប្រភព​ព័ត៌មានណាស់, ជា​ពិសេស​​សាក្សី​រស់ដែល​ធ្លាប់​បាន​មក​សំរាក​ទទួល​ការ​ព្យាបាល​ក្នុង​មន្ទីរ​ពេទ្យ​នេះ។ មក​ទល់​សព្វ​ថ្ងៃ, សាក្សី​រស់​បែបនេះ​ គឹ​ខ្ញុំ​រក​មិន​ឃើញ​ទេ…។ អ្វីដែល​ខ្ញុំ​ចង់​ដឹង​ពី​សាក្សី​រស់​នោះ​គឺ តើការ​ប្រែក្លាយ​អារាម​វត្តស្បូវ​រីក អោយ​ទៅ​ជា​មន្ទីរពេទ្យ, ចាប់​ផ្តើម​តាំង​ពី​ពេល​ណាមក?… តើកម្មាភិបាល​ឈ្មោះអីខ្លះ ដែល​ជា​អ្នក​ទទួល​ខុស​ត្រូវ​​ប្រចាំ​នៅ​មន្ទីរ​ពេទ្យ​​នេះ?… ​និង​ថា តើ​ប្រសិទ្ធភាពនៃ​ការ​ព្យាបាល … Continue reading

Gallery

ឆ្នាំនេះ, គេហដ្ឋាន​សំណព្វចិត្ត​ខ្ញុំ បានដូរ​​ជញ្ជាំង​ពីស្លឹក​ ទៅ​​សង្កសី​ ហើយ…​​

This gallery contains 4 photos.

កាលពីចុងខែកញ្ញា ឆ្នាំ២០១៤ កន្លងទៅ, ខ្ញុំបាន​ដាក់ប្រកាស​មួយ បង្ហាញ​ពី​រូបភាព​គេហដ្ឋាន​របស់​អ្នក​ស្រុក​មួយ​​ខ្នង ​ស្ថិត​នៅជិត​ផ្លូវ​ជាតិ​លេខ៥ ត្រង់​ចន្លោះ​បង្គោល​គីឡូម៉ែត្រ​លេខ ១៤៨-១៤៩ ​ជិតនឹង​ទៅ​ដល់​ទីប្រជុំជន​​ស្រុក​ក្រគរ ខេត្តពោធិសាត់ ដែល​ខ្លឹមសារ​នៅ​ក្នុង​ប្រកាស​នោះ គឺខ្ញុំ​ដៅ​សំខាន់​ពី​ចំណូល​ដ៏​តិចតួច​ស្តួច​ស្តើង​​ ​របស់​ប្រជាកសិករខ្មែរ​យើង​នៅ​ទីជនបទ​ ដែល​បាន​មក​ពី​ការ​ប្រកប​របរ​ធ្វើស្រែ​តែ​មួយ​មុខ​គត់…។ កាលណោះ​ខ្ញុំ​បាន​កត់​សម្គាល់ឃើញ​ថាៈ ជារូបភាព, ម្ចាស់​នៃគេហដ្ឋាន​ដ៏​ជរានេះ ​ធ្វើ​ស្រែ​មួយ​ឆ្នាំ សន្សំ​ប្រាក់​ទិញ​បាន​ពាង​ដាក់​ទឹក តែបីគត់..!!.. ឥឡូវនេះ, គេហដ្ឋាន​ដែល​ខ្ញុំ​ចាត់​ជា​សំណព្វចិត្ត​​​របស់​ខ្ញុំ​នេះ ត្រូវ​បាន​ផ្លាស់​ប្តូរ​ជញ្ជាំង​ហើយ… គឺ​ដូរ​ពី​ជញ្ជាំង​​ស្លឹក​ធ្លុះធ្លាយ មក​ជា​ជញ្ជាំង​សង្កសី វិញ ដែល​មើល​ទៅ មិនសូវ​ជា​រខេក​រខាក​ដូចពីពេល​​មុនៗ​ ​ទៀត​ទេ…។ អ្វីដែល​ជា​សំណួរ​បន្ត​ទៀត​នោះ​គឺ ត់ើ​ពេល​ណា​ទើប​​ពួក​​គេ​​មាន​លទ្ធភាព​​សន្សំ​ប្រាក់​ ដើម្បី​ធ្វើ​​ផ្ទះ​ធំ​ទ្រនំ​ខ្ពស់​ រស់​នៅ​អោយ​បាន​សមរម្យ​ដូច​គេ​ដូច​ឯង​ទៅ?… ចំពោះ​សំណួរ​ខាង​លើ​នេះ តាមការ​យល់ឃើញ​របស់ខ្ញុំ, ​បើ​គ្រួសារ​កសិករនេះ ប្រកប​របរ​ធ្វើ​ស្រែ​តែ​មួយ​មុខ​គត់ នៅលើ​ផ្ទៃ​ដី​ដ៏​តូច​ចង្អៀត​នេះ គឺពិតណាស់, ពួកគេ​ច្បាស់​ជា​គ្មាន​លទ្ធភាព​សាងសង់​ផ្ទះ​ថ្មី​បាន​ឡើយ។ … Continue reading